ஆய்தல் அறிவுடையார்க் கண்ணதே!
எங்கும் தமிழ்! எதிலும் தமிழ்!
தமிழ்நாடு அரசின் பிற்படுத்தப்பட்டோர் நல இயக்ககத்தில் ஆறு பிரிவுகளில் உள்ள 128 கோப்புகள் மற்றும் 59 பதிவேடுகளைத் தமிழ் வளர்ச்சித் துறை உதவி இயக்குநர் மற்றும் உதவியாளர் ஆகியோர் குழுவாக இணைந்து மேற்பார்வை செய்து எடுத்த குறிப்புகளின் அடிப்படையில் வழங்கப்பெற்ற ஆய்வறிக்கை கடந்த வியாழக்கிழமை 03.09.2026 முற்பகல் 11.30 மணியளவில் நடைபெற்ற
கலந்தாய்வுக் கூட்டத்தில் முன் வைக்கப் பெற்றது.
பிற்படுத்தப்பட்டோர் நல இயக்கத்தின் அலுவலர் பெருமக்கள் முன்னிலையில் நிகழ்ந்த அக்கூட்டத்தில், அரசின் திட்ட வரைவுகள், செயல்முறைகள், அறிவிப்புகள் முதலியவற்றில் நற்றமிழ்ப் பயன்பாடு மின்னி மிளிர வேண்டியதன் அவசியத்தை வலியுறுத்திப் பேசினேன்.
அலுவலகக் கோப்புகளைக் கண்ணொற்றிக் கொள்ளும் கவினுடன் தயாரிப்பதும் பராமரிப்பதும் கவனம் பெறும் என்பதை அறிவுறுத்தினேன்.
வலைதளங்களின் வளமையும் வலிமையும் உணர்ந்து அவற்றைப் பயன்கொள்ளும் வழிமுறைகளையும் சுட்டிக் காட்டினேன்.
வெகு சிறப்பாகக் கோப்புகளைப் பேணும் அலுவலகப் பணியாளர்களைப் பனிதூங்கும் சொற்களால் பாராட்டி மகிழ்ந்தேன்.
‘தேனார் மலர்ச்சோலையில் திரியும் வண்டுகள்போல், அலுவலகப் பணிகளில் ஆர்வம் தழைக்க நுழைந்து, அரும்பணியாற்ற விழைந்து, செயலாற்றலில் மிகுந்து, செந்தமிழ் சீர்பெற எல்லோரும் ஒன்றிணைந்து உழைப்போம்’ என்று அனைவரையும் உற்சாகப்படுத்தி விடைபெற்றேன்.
பிற்படுத்தப்பட்டோர் நல இயக்ககத்தின் துணை இயக்குநர் திருமதி எஸ். சர்மிலி மற்றும் தமிழ் வளர்ச்சித் துறையின்
உதவி இயக்குநர் திருமதி மு. சாந்தி, உதவியாளர் திரு. ஏ.பொன்னுரங்கம் ஆகியோர் நிழலாய் உடன் இருந்தனர்.
Add a Comment