POST: 2026-07-18T10:07:17+05:30

”
Arul.2009/FB/#69030

எழுத்துச்சுடர் பூமணிக்குக் கண்ணீர்ப் பூக்கள்!

​இந்தியத் திருநாடு தன் அடிமை விலங்கொடித்துச் சுதந்திரக் காற்றைச் சுவாசித்த அந்தப் பெருமைமிகு ஆண்டில்,

தூத்துக்குடிச் சீமையின் கோவில்பட்டிக்கு மேற்கே ஆண்டிபட்டி எனும் அழகிய கிராமத்தில் பூலித்துரை – தேனம்மை தம்பதியரின் மகனாகப் பிறந்து கவிஞர் நீலமணியின் அலுவல் தோழராகவும் அரசுப் பணியில் கூட்டுறவுத் துறையில் துணைப் பதிவாளராய் அமர்ந்து ஓய்வு பெற்றாலும் தன் விருப்பப்பணியாகிய எழுத்துப் பணியில் ஒருபோதும் ஓய்வறியாதவராய் கரிசல் காட்டுப் பிதாமகன் கி.ரா. மற்றும் ‘தாமரை’ இதழாசிரியர் தி.க.சி. ஆகிய பெருந்தகைகளின் தூண்டுதலால் 1971-இல் ‘அறுப்பு’ எனும் சிறுகதை வழியே தன் முதல் கதையின் வாயிலாக விதைத்து, கரிசல் மண்ணின் வெக்கையையும் அம்மக்களின் வியர்வை வாடை குன்றாத வாழ்வியல் நுட்பங்களையும் தன் எழுதுகோலின் மையால் உலகிற்கு பறைசாற்றிய மாபெரும் இலக்கிய விருட்சமாகவும், திக்கெட்டும் புகழ்ப்பரப்பிய ‘அஞ்ஞாடி’ புதினத்திற்காக 2014-ஆம் ஆண்டின் சாகித்திய அகாதெமி விருதினை மகுடமாய்ச் சூடியும், தேசிய திரைப்பட வளர்ச்சி நிறுவனத்தின் தயாரிப்பில் ‘கருவேலம்பூக்கள்’ திரைப்படத்தின் மூலம் பன்னாட்டு அரங்குகளிலும் கலைப் பயிரை அறுவடை செய்தும், அந்த எழுத்துச் சுடரின் அரும்பெரும் இலக்கியத் தவத்தை அங்கீகரித்துத் தமிழ்நாடு அரசு ‘கனவு இல்லம்’ திட்டத்தின்கீழ் கடந்த 03.05.2023 அன்று இல்லம் வழங்கிச் சிறப்பித்த பெருமைக்குரியவருமான பூலித்துரை மாணிக்கவாசகம் எனும் இயற்பெயர் கொண்ட பூமணி (12 மே 1947 – 12 சூலை 2026) அவர்கள்,
​”விதைகள் ஒருபோதும் மண்ணில் இறப்பதில்லை;
அவை விருட்சமாவதற்காகவே உறங்கச் செல்கின்றன!”
​என்கிற இயற்கையின் தத்துவத்திற்கு ஒப்ப, காலக்கணக்கை முடித்துக்கொண்டு இயற்கையின் மடியில் உறங்கச் சென்றுவிட்ட அப்பேராளுமையைப் பிரிந்து கண்ணீர்க் கடலில் தவிக்கும் அவரது அன்புத் துணைவியார் திருமதி செல்லம், மக்கட்செல்வங்களான திருமதி கவிதா, திரு. சிபி, திரு. ரவி மற்றும் அவரின் நெருங்கிய உறவினர் எழுத்தாளர் தர்மன் அனைவருக்கும் என் ஆழ்ந்த இரங்கலைத் தெரிவித்துக் கொள்கிறேன்.