”
Arul.2009/FB/#68993
திரையில் மறையலாம்!
திரையே மறையலாமா?
அனுபவங்களைப் படமாக்குபவர்கள் பலர்.
ஆனால், திரையார்வலர்களுக்கு அனுபவத்தையே அனுபவிக்க வைத்துப் படம் எடுத்தவர் ‘இயக்குநர் இமயம்’ பாரதிராஜா ஆவார்.(1941-2026)
பள்ளி மாணவனாக இருந்த பொழுது கொடைக்கானலில் வாலிபமே வா வா திரைப்படம் எடுத்துக் கொண்டிருந்த பொழுது நேரில் சந்தித்து அப்பாவுடன் பேசி மகிழ்ந்தார்.
மாநிலக் கல்லூரியில் இளங்கலை படித்துக் கொண்டிருந்தபோது
என் பெற்றோர்களுடன் அவரின் முதல் மரியாதை திரைப்படத்தின் முன்காட்சிக்குச் சென்றிருந்தேன்.
அப்பொழுதும் இயக்குநர் இமயம் பாரதிராஜா அவர்களைச் சந்தித்தேன்.
அவர் என்னை உற்றுப்பார்த்து, “என்னப்பா, அப்படியே உன் அப்பாவின் ஜெராக்ஸ் காப்பியாக இருக்கிறாயே!” என்று கூறிப் பாராட்டினார்.
நாள்தோறும் அப்பா முதல் மரியாதைப் படத்தில் இடம்பெற்ற கவிப்பேரரசு வைரமுத்துவின் பாடல்களை வரிவிடாமல் சுட்டிக்காட்டி பாராட்டுவார்.
“போறாளே பொன்னுத்தாயி பொலபொலவென்று கண்ணீர் விட்டு…” என்ற பாடல் வரியைக் கேட்கும்போதெல்லாம், அதைக் கேட்பவர்களின் கண்களிலிருந்து பொலபொலவென நீர் உதிர்வதை நான் நேரில் பலமுறை கண்டிருக்கிறேன்.
சில ஆண்டுகளுக்கு முன்பு, இயக்குநர் இமயம் பாரதிராஜா அவர்களைப் ‘பாம்குரோவ்’ விருந்தகத்துக்கு அருகிலுள்ள அவருடைய அலுவலகத்திற்குச் சென்று சந்தித்து மகிழ்ந்தேன்.
மூன்று மாதங்களுக்கு முன்பு, தியாகராய நகரிலுள்ள பாரதிராஜா மருத்துவமனைக்குச் சென்றிருந்தபோது, “அவர் மேல் தளத்தில்தான் உள்ளார்; ஆனால் இப்போது யாரையும் பார்க்கமாட்டார்” என்று அங்கிருந்தவர்கள் தெரிவித்தார்கள்.
ஆகாயத்திற்கு அடுத்து, அதிகமான நட்சத்திரங்களைத் திரையுலகில் அறிமுகப்படுத்தியவர் அவர்.
அல்லி நாட்டு அரசர்!
”என் இனிய தமிழ் மக்களே…” உங்கள் பாசத்துக்குரிய பாரதிராஜா என்று தன்னுடைய கரகரப்பான குரலில் மிடுக்காக தமிழ் மக்களை விளித்த பெருமைக்குரியவர்.
”மந்தையிலே நின்றாலும் நீங்கள் வீரபாண்டி தேரு!” என்று போற்றப்பட்ட ஆளுமை மறைந்த செய்தி, நெஞ்சை வருந்தச் செய்கிறது.
அவரின் திரைக்காவியங்களின் வழியாக நாம் புகுந்து பார்த்தால் அவரை இன்னமும் நேரடியாகக்காணலாம்
ஆழ்ந்த இரங்கல்!
Add a Comment